Ríkið er orsök þess að vöruverð er hátt á Íslandi

Svona fréttir benda manni á það með svo afgerandi hætti hvað við erum skattlögð í topp hér á íslandi, með beinum og óbeinum hætti! "skorað á ríkisstjórn og Alþingi að fella niður 20-25% vörugjöld á raftæki, hreinlætistæki og byggingavörur" segir Samtök verslunnar og þjónustu .. og þetta eru vörugjöld sem maður hefur ekki hugmynd um. Álög ríkisins á kjúkling er víst meira en 300% áður en hann kemst upp í hillur kaupmanna, og þær álögur breyttust ekkert 1. mars - þá var bara lækkaður virðisaukaskatturinn.

Það er mjög sorglegt að ríkið hafi notað tækifærið til að auka skattheimtu þegar þeir voru að auka innflutningskvóta á kjöti núna í mars - þeir buðu kjötkvótana út og seldu hæstbjóðanda. Viðkomandi aðili þarf þá að hækka innflutta kjötið enn meira, til að borga ríkinu fyrir að fá að flytja það inn. Dulin skattheimta er allstaðar í þessu landi.. og þegar það er talið saman erum við án efa að borga jafn mikinn skatt og frændur okkar danir - sem borga mun minna til ríkisins af áfengi og mat.

Það er nokkuð merkilegt að Samfylkingin sé sá flokkur sem er oftast sammála SVÞ, og í raun stórmerkilegt að það sé eini flokkurinn sem vill alvöru aðgerðir til að lækka matvöruverð hér á landi með því að afnema tolla og gjöld á landbúnaðarafurðir. Ég held að þetta undirstriki algjörlega muninn milli Vinstri Grænna og Samfylkingarinnar - þótt þeir séu sammála um að leggja áherslu á jöfnuð í samfélaginu og hætta stóriðjuframkvæmdum þá eru þeir gjörólíkir þegar kemur að verslun og þjónustu. Þar stöðvuðu VG nýlega það að bjór og léttvín kæmist í búðir, sem Samfylkingin tók þátt í að leggja það fram á þingi. Þeir vilja líka færa sig frá EES samningnum og fara í tvíhliða samninga við ESB, sem er langt og erfitt ferli sem mun ekki verða neinum til hagsbóta.. og svo leggjast þeir algjörlega gegn einkavæðingu.

Fyrir mér er alveg gjörsamlega óskiljanlegt hvernig nokkrum manni dettur í hug að kjósa VG - því þótt þeir séu á móti álverum þá eru þeir bara á móti öllu öðru. Steingrímur J var meira að segja á móti því að leyfa bjórinn á sínum tíma, og vildi frekar að fólk myndi bara bjóða vinum sínum í kaffi.

Hvetja til þess að uppboðum og sölu á tollkvótum verði hætt

Frábærar fréttir

Þetta eru ótrúlega góðar fréttir! Ari Jónsson er án efa einn hæfasti tölvunarfræðingurinn á landinu, og að fá hann í hóp við allt þetta ótrúlega hæfa starfsfólk sem er í tölvunarfræðinni upp í HR er bara frábært. Ég tók þarna masterinn minn, en var það snemma í því að ég ákvað að fara út til DTU eina önn og til University of Alberta í Canada aðra önn af mastersnáminu mínu þannig að ég er með ágætan samanburð á milli skóla, og ég verð bara að segja að HR stendur ekkert langt að baki þessa tveggja ótrúlega góðu skóla sem ég var við. Nú er það orðið þannig að næstum helmingur þeirra sem hafa Dr. gráðu í tölvunarfræði eru að vinna við rannsóknir í HR, og ég held að næstum 90% af rannsóknarpeningunum í tölvunarfræði séu að fara upp í HR, þannig að það er að myndast stort bil á milli HÍ og HR á þessu sviði.

Nú með tilkomu nýs rektors sem mun án efa skilja mikilvægi þessarar deildar fyrir skólann, og liðstyrkurinn að fá Ara við skólann þá er ljóst að þetta er að verða tölvunarfræðideild á heimsmælikvarða, sem ég mæli með fyrir alla þá sem eru að huga á eitthvað tölvu-tengt nám í framtíðinni.

En best að drífa sig að borða eitthvað..

Tveir nýir deildarforsetar ráðnir til HR

Sækjum um aðild!

Það er eina leiðin til að geta fengið vitræna umræðu; semja um aðild, og sjá svo hvort við getum sætt okkur við aðildarsamningana í þjóðaratkvæðargreiðslu. En miðað við könnunina sem SI voru að birta í dag samt held ég að núverandi stjórnvöld þori ekki að hætta á það, enda gæti þjóðin óvart samþykkt aðildarsamningana í atkvæðagreiðslunni og gengið í ESB.

Umræða um ESB óviðunandi

Góð skýrlsa.. áhugafólk um ESB ætti að lesa hana.

Þar sem ég er í vinunni þá eyddi ég bara kaffihléinu mínu til að lesa hana, en það er greinlegt að hérna er um góða skýrslu fyrir þá sem vilja kynnast Evrópusamstarfinu betur og skilja hversu mikið við erum í raun orðin aðilar að ESB með EES aðildinni okkar. 

Mæli með að lesa sérálit Össurar og Ágústar aftast, og bera það svo saman við álit annarra nefndarmanna. Það skilur himinn og haf milli Samfylkingarfólks, sem hefur verið að skoða þessi mál síðan flokkurinn þeirra var stofnaður, og svo hinna flokkana sem annaðhvort skoða þetta í frístundum eða loka algjörlega á umræðuna eins og Sjálfstæðisflokkurinn hefur verið að gera.

Samfylkingin hefur staðið að gerð rita um hver samningsmarkmið okkar ættu að vera við inngöngu, og hvaða áhrif aðild að ESB myndi hafa - og það sérst glögglega á lestri þessarar skýrslu að þeir Össur og Ágúst hafa mun meiri skilning á ESB og því að sameiginleg auðlindastefna sé engin fyrirstaða við aðild Íslands að því sambandi.

EES-samningurinn nýttur til að hafa áhrif á Evrópusambandið

Evru fyrir alla!

Bankarnir og fyrirtækin eru að biðja um að henda krónunni vegna þess að það er ómögulegt að vera með gjaldmiðil sem stjórnvöld vilja láta sveiflast með þorskverði, þegar sá hluti þjóðarbúsins sem stækkar hraðast er orðinn svona nátengdur Evrópu.

Það er einfaldlega öllum til hagsbóta að losa sig við þessa örmynt sem er ekki að gera neinum gott. Krónan er gagnslaust fjármálastjórnunartæki, og flotgengið, peningamálastefna seðlabankans og fjármálastjórn ríkisins hafa algjörlega brugðist þannig að við sitjum uppi með hæstu verðbólgu evrópu fyrir utan Tyrkland.

Hér þarf alvöru gjaldmiðil, sem þvingar ríkistjórnina til að vera með alvöru hagstjórn, því eins og Milton Friedman segir "inflation is just another form of taxation" eða verðbólga er bara annað form skattlagningar. Hér á íslandi endar verðbólgan á húsnæðislánunum okkar til 40 ára, og það er óafsakanlegt að ríkið hafi hækkað íbúðarlánin mín um meira en miljón á þessu ári bara útaf því að það eru að koma kosningar!

Straumur-Burðarás knúinn til að kanna möguleika á að fara til annars lands

Minnkar atvinnuleysi í ESB landi!?

ha! 3,5% atvinnuleysi og fer minnkandi! En Danir eru í Evrópusambandinu! HVERNIG GETUR ÞETTA VERIÐ!  

Eru meðaltöl kannski ekki smitandi innan sambandsins?! Mun meðalhiti þá ekki hækka á íslandi við aðlid!

Já, þetta er skrýtið.

Enn minnkar atvinnuleysi í Danmörku

Íhald til allra átta

Íhaldið á hægri og vinstri væng stjórnmálanna ná ótrúlega vel saman! og það með einhverri svona tylliástæðu sem allir sem horfa fordómalaust á Evrópusambandsaðild eru löngu búnir að sjá að er ekki fyrirstaða. Þingmenn VG og Sjálfstæðisflokks hefðu kannski átt að mæta á þennan fund hjá Evrópusamtökunum, þar sem það kom skýrt fram að við munum sjálf hafa yfirráð yfir öllum þeim kvóta sem úthlutað verður við ísland, þannig að ESB aðild mun ekki þurfa að breyta neinu í fiskveiðimálum okkar.

Það kom líka fram hjá Högre í Noregi á fundi Heimdalls um daginn að ungir sjálfstæðismenn væru gjörsamlega að misskilja auðlindastefnu ESB, þar sem hægri mennirnir í Noregi bentu þeim enn og aftur á að við myndum ein sitja að kvótanum hér við ísland - alveg eins og ungir jafnaðarmenn og Samfylkingin hafa verið að benda á síðastliðin ár!

Það er bara alveg til skammar að skýla sér bakvið þetta mál í Evrópuumræðunni - umræðan um þetta mál á að vera búið. Að VG láti ritstýra sér og stjórna á þennan hátt af Birni Bjarnasyni í þessari nefnd fær mann til að vera hræddann um að ríkistjórn VG og íhaldsins geti orðið að veruleika - ríkistjórnin sem mun engu breyta.  

 

VG og Sjálfstæðisflokkur gegn ESB-aðild

Grein dagsins..

Er pistillinn frá Hallgrími Helgasyni á Visi, þar sem hann bendir á meðferðina sem Ingibjörg Sólrún er að fá þessa dagana.

http://visir.is/article/20070219/SKODANIR04/102190084

Mæli með að lesa þetta með morgunkaffinu og aðeins spá í þetta..

Illugi er bara politíkus, engin hagfræðingur..

Fínt að geta bent á aðra og sakað þá um stefnuleysi, þegar öll rökhyggja dettur úr hausnum á manni korter í kosningar. Það gerir Illugi Gunnarsson á Visi í dag þegar hann tekur sér stefnumótunarhlutverk fyrir Samfylkinguna enn einusinni. Þar semsagt fer hann að ræða auðlindargjald á sjávarútvegi einsog það sé einhver grýla gegn samfylkingunni; en samfylkingin var ekki ein með þessa stefnu, hún var t.d. niðurstaða auðlindanefndar sem var leidd af Jóhannesi Nordal og var með vini hans Styrmi Gunnarsson og Ragnar Árnason innanborðs. Jón Steinson, deiglumaður og doktorsnemi "íslands" í hagfræði, hefur oft bent á hagkvæmni þess að fara þessa leið - en þegar nær dregur kosningum þá veit pólitíkusinn Illugi best, en hagfræðingnum Illuga verið bolað frá.

Eignarhald á fiskimiðunum er skilgreint í stjórnarskrá sem sameiginleg auðlind þjóðarinnar. Samfylkingin er ekki á móti aflamarkskerfinu, eða kvótakerfinu, heldur aðeins ranglátri úthlutun kvóta oft nefnt gjafakvóta. Það kerfi verður til þess að einn maður selur kvótann sinn úr byggðarfélögum, eins og gerðist í Grímsey fyrir stuttu, og kippir þar með stórum parti af atvinnustarfseminni burt með nokkurn veginn einu pennastriki. Það er hagkvæmara fyrir byggðirnar í landinu, sjávarútveginn og almenning ef það skapast meiri vissa um eignarhaldið; uppboð á 5% kvótans á ári, þannig að allur kvótinn verður kominn á uppboðsmarkað á 20 árum, er bara mjög gott og skýrt kerfi sem hróflar ekki við miklu - og betri hagfræðingar landsins benda á að það sé hagkvæmara kerfi sem auðveldi nýliðun.

Illuga finnst samt allt í lagi að í núverandi kerfi sé verið að fyrna kvótann til að rétta byggðum landsins hann aftur sem svokallaðan byggðarkvóta - bara til að plástra þetta kerfi vegna ranglátra úthlutunarreglna. Þar er verið að taka veiðiréttindin af hagkvæmustu útgerðunum, og rétta þeim byggðarfélögum sem hafa orðið fyrir þeim áföllum að kvótaeigandinn stakk af. Það versta er að þeir útgerðarmenn sem fá úthlutaðan byggðarkvóta nota tækifærið og leigja burt kvótann sinn á meðan - því þeir "eiga" hann og því upplagt tækifæri til að taka þátt í góðærinu.

Það er gott fyrir þessa ríkistjórn að eiga svona sprelligosa einsog Illuga og Pétur Blöndal sem eru allt öðruvísi í orði, en ríkistjórnin er í borði. Hafa sauðfjársamningarnir t.d. einhverntímann verið á stefnuskrá Sjálfstæðisflokksins? eða fær bara Dagfinnur dýralæknir að gera hvað sem er sem fjármálaráðherra? Þarf ekkert að framfylgja stefnunni sinni þegar maður er kominn í stjórnarráðið?

Ekki í stjórnartíð Sjálfstæðisflokksins..

Það verður ekki dregið úr stuðningi við landbúnað á íslandi í stjórnartíð Sjálfstæðisflokksins, heldur hefur hann aðeins aukist! Þeir eru búnir að hafa nokkuð mörg ár til þess núna, en þeir voru ekki tilbúnir til þess með Alþýðuflokknum á sínum tíma og hafa í raun meiri áhuga á að vinna með VG en Samfylkingunni þessa dagana til að forðast umræðu um Evrur og landbúnað. Síðasti fjármálaráðherra sem skar niður til bænda var Ólafur Ragnar, og það um 30-40%.

Sjálfstæðisflokkurinn er líklegur til að einkavæða Landsvirkjun, en allt hitt á listanum er eitthvað sem mun ekki gerast fyrr en annaðhvort Samfylkingin verður ráðandi afl í íslenskri pólitík, eða að við göngum í ESB. Innan ESB eru helmingi lægri styrkir til landbúnaðar en hér, og við þyrftum líklegast að leyfa erlendum aðilum að fjárfesta í sjávarútvegi. Punktur OECD um menntamálin er eitthvað sem t.d. Ágúst Ólafur hefur verið að benda lengi á, og lausnin er klárlega ekki að taka upp skólagjöld þannig að enn færri geti farið í framhaldsnám - LÍN er nógu fjandsamlegt fyrir námsmenn nú þegar.

Burt með Íhaldið.. því þessi ríkistjórn er ekkert annað. Það vonda er að það fylgja bara litlar framfarir VG og maður vill ekki sjá S+D vinna saman. Helst bara að fá minnihlutastjórn næst.

OECD vill minni stuðning við landbúnað en meiri við menntun